लोणी भापकरच्या राजे प्रतिष्ठानकडून शिवजयंती उत्साहात साजरी

डिजिटल महाराष्ट्र न्यूज : प्रतिनिधि
राजे प्रतिष्ठान लोणी भापकर यांच्यावतीने गेली अकरा वर्षापासून छत्रपती शिवाजी महाराजांची जयंती मोठ्या उत्साहात साजरी करण्यात येत आहे.
यावर्षी रायरेश्वर ते लोणी भापकर अशी शिवज्योत मंडळाच्या वतीने आणण्यात आली. त्यानंतर गावातील ग्रामपंचायत कार्यालय समोर छत्रपती शिवाजी महाराजांच्या मूर्तीचे पूजन करण्यात आले. शिवजयंतीच्या निमित्ताने यावर्षी निबंध स्पर्धेचे आयोजन करण्यात आले होते.
लोणी भापकर येथील विठ्ठल गोलांडे (गुरुजी) व सुपर ट्रेकर्स वेलफेअर ट्रस्ट हे करत असलेले गड संवर्धन आणि सामाजिक कार्य याची पावती म्हणून त्यांना सन्मानचिन्ह देऊन त्यांचा सत्कार करण्यात आला. सायंकाळी पारंपारिक पद्धतीने छत्रपती शिवाजी महाराज यांची मिरवणूक काढण्यात आली. यामध्ये नवलाई लेझिम पथक लोणी भापकर व सिद्धिविनायक ढोलपथक वडगाव रसाई यांनी आपली कला सादर केली. रात्री ग्रामस्थांसाठी महाप्रसादाचे आयोजन करण्यात आले होते. गेली अकरा वर्षापासून राजे प्रतिष्ठान लोणी भापकर हे सामाजिक, शैक्षणिक, सांस्कृतिक आणि क्रीडा विभागामध्ये काम करीत आहेत. यावेळी राजे प्रतिष्ठान मंडळाचे पदाधिकारी, कार्यकर्ते, महिला व ग्रामस्थ मोठ्या संख्येने हजर होते. यावेळी प्रतिष्ठानच्या वतीने ग्रामस्थांचे आभार मानले.